Polonia do të ndërtojë centralin e dytë bërthamor në vitin 2027, planifikon të zgjedhë partnerin e ri

Polonia planifikon të zgjedhë një partner për centralin e saj të dytë bërthamor në vitin 2027 dhe të konfirmojë vendndodhjen e tij vitin pasardhës. Kështu deklaroi të premten zëvendësministri i energjisë, Wojciech Wrochna ndërsa prezantoi planin e përditësuar të vendit për kapacitetin e energjisë bërthamore.

Programi parashikon që Polonia përfundimisht do të ketë 6-9 gigavat kapacitet të centralit bërthamor, ndërsa largohet nga flota e energjisë me bazë qymyri.

Termocentrali i parë është planifikuar të furnizojë rrjetin me energji elektrike në vitin 2036 dhe ndërtimi i tij do të fillojë në vitin 2028.

Polonia ka zgjedhur kompaninë amerikane Westinghouse Electric për të ndërtuar centralin e saj të parë bërthamor në bregdetin e Detit Baltik dhe ka filluar konsultimet për të zgjedhur një partner për një central të dytë, duke ftuar kandidatë nga SHBA-ja, Franca, Kanadaja dhe Koreja e Jugut.

Varshava nuk është më në dialog me Korenë e Jugut për projektin, pasi partnerët e mundshëm të Koresë së Jugut nuk i janë përgjigjur ftesës, tha Ministri i Energjisë Milosz Motyka në të njëjtën konferencë.

Qeveria pret që një partner i zgjedhur të sigurojë financim për projektin, tha Wrochna.

Vendet e preferuara për projektin e dytë bërthamor përfshijnë Belchatow dhe Konin në Poloninë qendrore.