GREQI – Të paktën 12 të vdekur në dy aksidente me varka me emigrantë

ATHINË, 19 tetor /ATSH-ANA/- Të paktën 12 persona kanë humbur jetën në dy ngjarje të veçanta me varka që transportonin emigrantë, pranë ishujve grekë Lesbos dhe Samos.

Në rastin e parë, një varkë u përplas gjatë natës me një anije të Rojës Bregdetare greke, në juglindje të ishullit Lesbos.

Si pasojë, humbën jetën gjashtë persona, mes tyre edhe një foshnjë, raportoi transmetuesi publik grek ERTNews, duke iu referuar autoriteteve.

Sipas raportimit, tetë persona u shpëtuan. Rrethanat e sakta të aksidentit do të hetohen.

Ndërkohë, në veri të ishullit Samos po vijon një operacion kërkim-shpëtimi, pasi një tjetër varkë me emigrantë u përmbys.

Agjencia greke e lajmeve ANA-MPA raportoi se deri në atë moment, ishin nxjerrë nga uji gjashtë trupa të pajetë.

Sipas agjencisë, 14 persona të tjerë u shpëtuan.

Sipas Agjencisë së Kombeve të Bashkuara për Refugjatët (UNHCR), numri i personave që mbërrijnë në Greqi si refugjatë është në rënie këtë vit.

Deri më 11 tetor, në Greqi ishin regjistruar rreth 25 000 mbërritje përmes detit.

Gjatë gjithë vitit të kaluar, ky numër ishte rreth 42 000. /