Prej gjashtë ditësh në flakë Mali i Dardhës në Librazhd, terreni i vështirë pengon shuarjen e zjarrit

Prej gjashtë ditësh, një zjarr i përmasave të mëdha vijon të djegë masivin pyjor në zonën e Malit të Dardhës, në Njësinë Administrative Hotolisht, Bashkia Librazhd, ndërsa operacioni për shuarjen e flakëve vazhdon në kushte të vështira.

Sipas të dhënave nga terreni, ndërhyrja e forcave zjarrfikëse është vështirësuar nga relievi i thyer, i përbërë nga shkëmbinj, drurë të rrëzuar ndër vite dhe një shtresë e trashë humusi, faktorë që favorizojnë riaktivizimin e vatrës.

Deri më tani, flakët kanë përfshirë rreth një hektar sipërfaqe me shkurre, ferra dhe drurë të rrëzuar. Megjithëse zjarri është izoluar dhe mbahet nën kontroll, era gjatë orëve të ditës riaktivizon flakët, duke detyruar ekipet e angazhuara të qëndrojnë në gatishmëri të vazhdueshme.

Forcat e Shërbimit të Mbrojtjes nga Zjarri dhe Shpëtimit vijojnë operacionin me synim shuarjen e plotë të vatrës dhe parandalimin e përhapjes së zjarrit drejt sipërfaqeve të tjera pyjore.