Princ Harry dhe Meghan do të prodhojnë një film për luftën në Afganistan në Netflix

Duka dhe Dukesha e Sussex do të bëjnë një film të bazuar në një histori të vërtetë të trupave britanike nën rrethim gjatë luftës në Afganistan.

Kompania e prodhimit të çiftit, Archewell, po zhvillon një film artistik për Netflix bazuar në librin “No Way Out” nga Major Adam Jowett.

Major Jowett udhëhoqi një njësi ushtarësh që mbrojti një kompleks në qytetin Musa Qala, një bastion i talebanëve në provincën Helmand, nga valët e sulmeve në vitin 2006.

Është një temë shumë personale për Princin Harry, ai kaloi 10 vjet në Ushtrinë Britanike deri në vitin 2015, duke përfshirë dy turne detyre në Afganistan.

Ai ka vazhduar të jetë i përfshirë me veteranët, duke përfshirë edhe lançimin e Lojërave Invictus për personelin e shërbimit të plagosur, të lënduar dhe të sëmurë.

Më herët këtë vit, ai foli pasi Presidenti i SHBA-së Donald Trump bëri komente kontraverse se aleatët, përfshirë Mbretërinë e Bashkuar, qëndruan “pak larg” nga vijat e frontit në Afganistan. Trump më vonë përdori platformën e tij Truth Social për të lavdëruar trupat britanike si “ndër luftëtarët më të mëdhenj”.

“Shërbeva atje. Atje krijova miq për gjithë jetën. Dhe atje humba miq”, tha Duka.

Ai dhe dukesha do të shërbejnë si bashkëproducentë në adaptimin e ri filmik të “No Way Out”.

Libri u botua në vitin 2019 dhe përshkruhet nga botuesi i tij si një rrëfim “i fuqishëm, plot energji dhe prekës”.

Skenari i filmit po shkruhet nga Matt Charman, i cili u nominua për çmimin Oscar në vitin 2016 për bashkë-shkrimin e dramës së Luftës së Ftohtë të Steven Spielberg, “Bridge of Spies”.

Është projekti më i fundit filmik dhe televiziv i çiftit Sussex me Netflix. Ata po prodhojnë gjithashtu adaptime të filmit “The Wedding Date” nga Jasmine Guillory, dhe një dramë të vendosur në botën e polos, pasi kanë bërë një serial dokumentar rreth këtij sporti.

Megjithatë, marrëdhënia e çiftit me Netflix u përkeqësua vitin e kaluar.

Pasi kontrata e tyre e mëparshme përfundoi verën e kaluar, ajo u zëvendësua nga një “marrëveshje me shikim të parë”, e cila i jep Netflix-it refuzimin e parë për çdo shfaqje të re të propozuar nga duka dhe dukesha.