Rehabilitimi dhe përmirësimi i rrugës Vlorë-Orikum synon që t’i japë fund problematikës së vazhdueshme të trafikut që krijohet në këtë zonë sidomos në periudhën e verës. Nga ana tjetër edhe ndërhyrja në Shëngjin-Baks-Rrjoll ka të njëjtën objektiv. BERZH njoftoi se konkretisht kontratat mbi dy rrugët do të nisin procedurat pas datës 24 shkurt ndërsa më pas do të vijohet me elementët e tjerë përbërës si mbikëqyrja apo mbështetja e ekipit të Fondit Shqiptar të Zhvillimit që është edhe institucioni përgjegjës për projektin.
Më herët jgjatë këtij viti FSHZH zhvilloi procedurat që lidheshin me dizejnimin e planit sesi do të ndryshojë rruga Vlorë, Rradhimë-Orikum.
Programi i Konektivitetit të Rrugëve Lokale dhe Rajonale përfshin dy aspekte që po financohen nga BERZH dhe Banka Botërore dhe janë të vendosura kryesisht në zona me potencial të lartë bujqësor dhe turistik.
Kështu sipas projektit parashikohen ndërhyrje konkrete për rritjen e dimensioneve të tombinove dhe urave, mbrojtjen shtesë për skarpatet me qëllim minimizimin e efekteve të rrëshqitjeve të tokës, modifikimin e formulave të asfaltit për t’i rezistuar temperaturave të larta, rritjen e dimensionit të kanaleve anësore.
Lidhur me sigurinë rrugore, programi sjell risi përsa i përket standardeve të projekteve infrastrukturore të zbatuara deri më tani. Financimi i masave për përmirësimin e sinjalistikës rrugore parashikon ndërhyrje në kalimet e këmbësorëve si trotuarë dhe korsi biçikletash, vijëzimet, sinjalistikën vertikale, sinjalistikën turistike.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.