Prokuroria fillon një hetim mbi fushatën presidenciale të Sarkozy të vitit 2007

Drejtësia franceze filloi sot një hetim paraprak mbi ish-presidentin francez Nicolas Sarkozy mbi dyshime që kanë të bëjnë me financim ilegal të fushatës së tij presidenciale të vitit 2007, shkruan sot e përditshmja “Aujourd’hui en France” dhe “Le Parisien”, ndërkohë që një hetim është duke u kryer për sa i përket fushatës elektorale të vitit 2012.

Sipas të përditshmes, që nuk i citon burimet e saj, “prokuroria e Parisit ka filluar në fillim të korrikut një hetim paraprak mbi Nicolas Sarkozy dhe partinë e tij të krahut të djathtë, UMP, mbi financime ilegale të fushatës së shtatë viteve më parë”.

E përditshmes popullore shkruan se, “hetimet bien mbi një sistem faturash falso që i kanë mundësuar kandidatit të mbulojë me mashtrim shpenzime të larta elektorale në llogari të partisë së tij”.

Këto hetime i bashkangjiten atyre që kanë filluar që prej 27 qershorit që kanë të bëjnë me financime ilegale të fushatës së ish-presidentit në vitin 2012.