Protesta në Zvërnec/ Arrestohet punonjësi i sigurisë që goditi qytetarin, në hetim gjithë zinxhiri komandues i Policisë

Drejtoria e Përgjithshme e Policisë së Shtetit ka njoftuar se është identifikuar, kapur dhe arrestuar punonjësi i një shoqërie private sigurie, i cili u pa në pamjet filmike duke goditur me grusht shtetasin E. S. gjatë tubimit të banorëve të fshatit Zvërnec, më datë 30 maj 2026, në vendin e quajtur “Portonovë”.

Shtetasi i arrestuar është G. Biba, 32 vjeç, banues në Durrës, i dyshuar për veprat penale “Heqja e paligjshme e lirisë” dhe “Plagosja e lehtë me dashje”. Hetimet tregojnë se ai, në bashkëpunim me shtetasit A. G. dhe G. V. (të proceduar penalisht), ka goditur qytetarin dhe më pas e ka tërhequr me forcë drejt vendit të rezervuar për rojet, duke i shkaktuar dëmtime të lehta trupore.

Paralelisht, Drejtori i Përgjithshëm i Policisë ka urdhëruar nisjen e një hetimi disiplinor për të gjithë zinxhirin komandues të DVP Vlorë, lidhur me masat dhe menaxhimin e tubimit. Hetimi po kryhet nga Drejtoria e Standardeve Profesionale.

Policia e Shtetit ka theksuar se është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe pronës, si dhe të ndëshkojë çdo punonjës policie që neglizhon detyrën apo abuzon me të.

Më 30 maj 2026, banorë të fshatit Zvërnec zhvilluan një tubim proteste në zonën e njohur si “Portonovë”, kundër projekteve të ndërtimit në bregdet.

Protesta u shoqërua me tensione, ku disa banorë u përplasën me rojet private të kantierit. Pamjet filmike të shpërndara në rrjete sociale treguan momentin kur një punonjës sigurie goditi me grusht një qytetar, duke shkaktuar reagim të menjëhershëm publik dhe institucional.