Pushime me vajzat në Itali, arrestohet shqiptari me 58 kg marijuanë
Një shtetas shqiptar është arrestuar në portin e Ankonës menjëherë pas zbarkimit nga një traget të ardhur nga Greqia, sepse iu kapën të fshehura në makinë 58 kilogramë marijuanë.
Operacioni është kryer nga Guardia di Finanza e Ankonës në bashkëpunim me Agjencinë e Doganës.
Shqiptari 42-vjeçar me inicialet B.P., ka deklaruar se ndodhej në Itali për pushime me gjithë dy vajzat e tij, 14 dhe 16 vjeç, por kjo deklaratë nuk i ka bindur agjentët doganorë, të cilët pas një kontrolli me qen antidrogë, gjetën 63 pako për një total prej 58 kilogramë marijuanë të fshehura në një fund të dyfishtë të mjetit, mes dy sediljeve të para.
Marijuanës i ishte hedhur madje edhe pluhur kafeje përsipër, për të shmangur nuhatjen nga qentë antidrogë.
Sipas policisë italiane, nëse do të shitej në treg, droga do të kapte vlerën e 600 mijë eurove.
42-vjeçari është arrestuar me akuzën e trafikut ndërkombëtar të substancave të paligjshme. Ngarkesa e marijuanës është sekuestruar dhe dy vajzat adoleshente u janë besuar disa të afërmve të shqiptarit në Itali.
