Putin takon Asadin në Moskë

Presidenti sirian Bashar al-Asad fluturoi drejt Moskës të martën për t’u takuar me homologun rus Vladimir Putin në atë që mendohet se është i pari udhëtim i tij jashtë vendit qysh prej fillimit të luftës në vitin 2011.

“Presidenti i Republikës Arabe të Sirisë, Bashar al-Asad, pati një vizitë pune në Moskë dje pasdite dhe bisedoi me presidentin rus Vladimir Putin”, deklaroi të mërkurën Dmitri Peskov, një zëdhënës i Kremlinit.

Ndërkohë Presidenca siriane konfirmoi se Asadi ishte në Moskë për një vizitë një ditore dhe se ishte rikthyer në Damask.

Në takim Putin tha se ishte shpresëplotë për arritjen e një zgjidhjeje për konfliktin në Siri, ku Rusia po bombardon nga ajri qysh prej fundit të shtatorit.

“Besojmë se mund të arrihet një marrëveshje afatgjatë mbi bazën e zhvillimeve të fundit ushtarake dhe përparimit politik me pjesëmarrjen e të gjitha palëve politike, etnike e fetare. Por ky vendim i takon vetëm popullit sirian. Siria është një vend miqësor dhe ne jemi gati ta mbështesim jo vetëm ushtarakisht, por edhe politikisht”, tha Putin.