Qendrat e të dhënave po “mbysin” rrjetin elektrik të Greqisë: banorët e Spatës në Gjykatën e Lartë, mbi 500 megavat të angazhuara në Atikë

Banorët e fshatit Christoupoli pranë Spatës, në Atikën lindore, i janë drejtuar gjykatës më të lartë administrative të Greqisë për ndërtimin e tre qendrave të të dhënash pranë shtëpive të tyre, siç njofton eKathimerini.

Në ankesën e tyre, banorët citojnë zhurmën 24-orëshe, nxehtësinë dhe mungesën e studimeve të ndikimit mjedisor. Rasti vjen në mes të një zgjerimi të shpejtë të infrastrukturës cloud dhe të inteligjencës artificiale në gjithë Greqinë.

Ekspertët paralajmërojnë se ky zgjerim po e sforcon rrjetin elektrik rajonal: më shumë se 500 megavat kapacitet në Atikë janë tashmë të angazhuara, duke shteruar plotësisht marzhet e disponueshme të energjisë. Sipas tyre, pa përmirësime të rëndësishme të linjave të tensionit të lartë dhe të nënstacioneve, rrjeti nuk ka më asnjë rezervë.

Analistët shprehin gjithashtu shqetësimin se konsumi i lartë i energjisë mund të rrisë çmimet lokale të energjisë elektrike nëse qendrat e të dhënave marrin energji nga tregu ekzistues dhe jo nga burime të reja të rinovueshme.

Zyrtarët qeveritarë, sipas eKathimerini, po përgatisin kritere më të rrepta licencimi për këto objekte.