Rama: 21 Qershori do ta shkundë PD-në. Na duhet një opozitë që nuk flet përçart

Nga Devolli, ku zhvilloi mitingun përmbyllës elektoral, Kryeministri Edi Rama u shpreh se 21 Qershori do të rikthejë edhe vetë Partinë Demokratike në drejtimin e duhur.

“Këto zgjedhje do të jenë një shkundje edhe për PD-në, sepse edhe PD-ja na duhet në drejtimin e duhur. Na duhet një opozitë që nuk flet përçart, por një opozitë që flet me njerëzit dhe për njerëzit dhe që mban nën tension qeverinë me alternativa, jo me shpifje”, tha Rama.

Kryeministri shtoi se ndarja e re administrative i jep fund mungesës së potencialeve të pushtetit vendor për t’u shërbyer qytetarëve, por edhe abuzimit prej kryetarëve.

“Qytetarët e Devollit kanë votuar gjithë këto vite për komunat, por kanë marrë shumë pak në rastin më të mirë dhe në rastin më të keq kanë marrë mbrapsht kryetarë komunash grabitës pyjesh, kullotash, kryetarë komunash që janë marrë me tjetërsime titujsh pronësie, me transformimin e ndihmës ekonomike në një lëmoshë për skllevër elektoralë. Kjo do të marrë fund më 21 Qershor!”, tha Rama.

Ndryshimet mes Korçës së drejtuar nga socialistët dhe Devollit të drejtuar nga demokratët, për Ramën janë dy shembujt tipikë që tregojnë dy modele të ndryshme. “Dy shembuj që ndajnë modelin tonë për zhvillimin e komunitetit me modelin e PD-së për të sunduar komunitetin”, tha ai.