Rama: “Ballkani i hapur” dhe procesi i Berlinit pjesë të njëra-tjetrës
Kryeministri Edi Rama deklaroi sot se “është koha për të projektuar të ardhmen përtej luftës duke kërkuar së bashku nga BE që të na përfshijë gjithnjë e më shumë në të gjithë përpjekjen e organizuar për t’i rezistuar goditjes së madhe të rritjes së çmimit të energjisë elektrike dhe inflacionit të luftës”.
Në mbledhjen e përbashkët të dy qeverive, Shqipëri- Maqedoni e Veriut që po mbahet në Shkup, Rama theksoi se duhet të ndërtohet një plan i përbashkët që të krijojë mundësinë të shohim përtej kësaj faze të vështirë e të zymtë, por jo të pambarimtë.
“Nuk kemi nevojë të presim fundin e luftës për të projektuar të ardhmen përtej saj”, tha Rama.
Sipas tij, Shqipëria dhe Maqedonia e Veriut kanë bërë një farë përgatitje duke u përpjekur të projektohen në të ardhmen jo thjesht në mënyrë individuale si shtete më vete, por edhe në mënyrë kolektive si vende të të njëjtës zonë gjeografike dhe gjeopolitike, si në aspektin e Ballkanit Perëndimor si rajoni ynë dhe të BE-së, si destinacioni ynë.
“‘Ballkani i hapur’ na ka dhënë shumë mundësi të reja për të parë përtej të djeshmes, për të kuptuar si mund ta kapërcejmë të sotmen dhe për të projektuar një të ardhme që të rrisë në maksimum aftësitë e vendeve tona që të përfitojnë në një hapësirë më të madhe se hapësira jonë e përveçme gjeografike. Kemi parë rezultatet e marrëveshjeve në kuadër të ‘Ballkanit të hapur’. Vazhdojmë të jemi mbështetës të palëkundur edhe të procesit të Berlinit duke pasur aftësi t’i shohim bashkë këto nisma si pjesë të njëra-tjetrës dhe jo përjashtuese të njëra-tjetrës”, tha Rama.
