Rama dënon sulmin e armatosur në eventin ku ndodhej Trump: Goditje ndaj lirisë dhe demokracisë

Kryeministri Edi Rama ka dënuar sulmin me armë gjatë darkës vjetore të gazetarëve në Washington DC, ku i pranishëm ishte edhe presidenti Trump.

Rama e ka cilësuar sulmin si kërcënim jo vetëm të lirisë, por dhe vetë jetës demokratike.

“Tronditëse të marrësh lajmin për një sulm të dhunshëm me armë nga një person i armatosur në një hotel në Washington, DC gjatë një aktiviteti presidencial me gazetarë. Një sulm i tillë godet lirinë dhe mënyrën tonë demokratike të jetesës kudo. E dënoj me forcë. I lehtësuar që presidenti Trump dhe të gjithë të pranishmit janë të sigurt dhe të shëndoshë,” shkruan Rama në X.

Sulmi me armë ndodhi mbrëmjen e së shtunës, gjatë eventit me Korespondentët e Shtëpisë së Bardhë në Uashington, ku të pranishëm ishin presidenti Donald Trump, Zonja e Parë dhe anëtarë të kabinetit qeveritar. Fatmirësisht nga të shtënat nuk pati të lënduar, ndërsa presidenti Trump u evakuua menjëherë.

Autori i dyshuar, një 31-vjeçar me profesion mësues, përfundoi në pranga. Hetimet zbuluan se ai kishte me vete një shotgun, një pistoletë dhe thika. Ai rezultoi të ishte klient në hotelin ku mbahej eventi. Autoritetet po analizojnë pamjet e kamerave të sigurisë për të kuptuar se si arriti të kalonte kontrollet.