Rama: Forcat ushtarake në shumë aeroporte të Europës dhe botës

“Forcat ushtarake në aeroportet e Parisit, Venecias, Frankfurtit dhe Amsterdamit, janë vendosur ashtu si në plot vende të tjera të Europës dhe botës demokratike, si reagim ndaj akteve cenuese për sigurinë e infrastrukturave aeroportuale dhe qytetarëve që i përdorin ato”.

Kështu deklaroi sot kryeministri Edi Rama, ndërsa publikoi edhe foto nga ambientet e këtyre aeroporteve.

Kryeministri iu përgjigj të gjithë atyre që e konsiderojnë shkelje të Kushtetutës, ruajtjen e perimetrit të jashtëm të aeroportit “Nënë Tereza” nga Policia Ushtarake.

“Ndërkohë beretat e kuqe të policisë sonë ushtarake janë vendosur thjesht në ruajtje të perimetrit të jashtëm të sigurisë. Prandaj kush flet për shkelje kushtetute, gjendje lufte, juntë ushtarake e marrëzira të tjera si këto, le të gjejë ndonjë arsye tjetër për të treguar se sa shumë i dhimbsen Kushtetuta dhe standardet demokratike”, – tha Rama.