Rama, kryetarëve të bashkive: Jeni fajtorë për tregjet jashtë standardeve

Qeveria shqiptare ka nisur një operacion të gjerë kundër tregjeve informale të gjësë së gjallë.

Në një takim me kryetarët e bashkive, kryeministri Edi Rama tha se kjo është një situatë alarmante, duke akuzuar drejtpërdrejt kryetarët e bashkive si përgjegjësit kryesorë për këtë situatë.

“Një pjesë e tyre janë deklaruar të mbyllura por nuk janë mbyllur, funksionojnë nën sytë tuaj me tolerancën tuaj dhe jashtë çdo lloj kujdesi minimal nga ana juaj për ti bllokuar. Aq më keq akoma ka disa bashki ku tregjet jo vetëm që janë çdo standardi, por bëjnë aktivitet të pa miratuara formalisht nga ju, dhe në dëm të përditshëm të higjienës të shëndetit të të drejtës së komuniteteve për t’i gëzuar këto standarde të higjienës dhe shëndetit. Janë tregje pa asnjë lloj rrethimi sipas standardeve të kërkuara me hyrje dalje të pa kontrolluar. Shërbimi veterinar kryhet në mënyrë më diskredituese, formalisht me korrupsion dhe pa bërë asnjë shërbim minimal disinfektimi”.

Nga 1 dhjetori, sipas kryeministrit, asnjë kafshë nuk do të shkojë në treg pa u çertifikuar.

“Ne duam që kjo situatë të adresohet urgjent dhe duam që nga data 1 dhjetor të gjitha kafshët që shkojnë në treg të jenë të shoqëruara me certifikatën veterinare, përndryshe do të sekuestrohen. Për këtë do të keni mbështetjen edhe të policisë. Për 2017 do të matrikullon kafshët që mbarshtrohen dhe ato që theren për mish dhe për pasojë nuk do të ketë shans të lëvizin kafshë të pamatrikulluara”, tha kryeministri.