Reforma administrative, ASIG dhe AMBU kalojnë në varësi të ministrive, zbatohet rekomandimi i SIGMA-s

Komisioni për Çështjet Ligjore dhe Administratën Publike, nën drejtimin e Ulsi Manjas, miratoi sot dy nisma ligjore që shënojnë një ndryshim të rëndësishëm në arkitekturën e institucioneve shtetërore në Shqipëri. Dy agjenci kyçe, që deri më sot raportonin drejtpërdrejt në Kryeministri, do të kalojnë në varësi të dikastereve përkatëse, si pjesë e strategjisë për “Forcimin e qendrës së qeverisjes”.

ASIG kalon në varësi të Ministrisë së Mbrojtjes

Projektligji i parë i shqyrtuar sjell ndryshime në ligjin për informacionin gjeohapësinor. Zëvendësministri i Mbrojtjes, Enkelejdi Joti, sqaroi përpara anëtarëve të komisionit se Autoriteti Shtetëror për Informacionin Gjeohapësinor (ASIG) do të jetë tashmë institucion në varësi të Ministrit të Mbrojtjes.

Ky ndryshim vjen si reflektim i drejtpërdrejtë i raportit të SIGMA-s të vitit 2025. Ekspertët ndërkombëtarë kanë rekomanduar reduktimin e numrit të institucioneve që varen direkt nga Kryeministri, me qëllim rritjen e efikasitetit dhe dekonsolidimin e pushtetit administrativ në qendër. Relatori i çështjes, deputeti Ani Dyrmishi, vlerësoi përputhshmërinë e nismës me Kushtetutën.

Agjencia e burimeve ujore kalon te Mjedisi

Në të njëjtën linjë me reformën administrative, zëvendësministri i Mjedisit, Genti Gazheli, prezantoi ndryshimet në ligjin “Për burimet ujore”. Agjencia e Menaxhimit të Burimeve Ujore (AMBU), një tjetër institucion që deri tani ishte nën ombrellën e Kryeministrisë, do t’i kalojë zyrtarisht Ministrisë së Mjedisit.

“Ky projektligj synon harmonizimin institucional. Kalimi i AMBU-së në varësi të ministrit të Mjedisit ndjek gjetjet e raportit të SIGMA-s për forcimin e qeverisjes dhe rregullimin e varësive hierarkike,” deklaroi Genti Gazheli gjatë mbledhjes.

Relatori Ani Dyrmishi konfirmoi se asnjë prej këtyre ndryshimeve nuk sjell kosto shtesë për buxhetin e shtetit, pasi bëhet fjalë vetëm për riorganizim të varësisë administrative. Pas diskutimeve, të dy projektligjet u miratuan në parim, nen për nen dhe në tërësi.