Rendimenti i bonove amerikane prek rekord 19-vjeçar: 10-vjeçari në 5.241%, Wall Street hap javën në rënie

Rendimenti i bonove 10-vjeçare të Thesarit amerikan u mbyll të hënën në 5.241%, duke prekur nivelin më të lartë në 19 vjet, ndërsa Wall Street e hapi javën me rënie të aksioneve.

Sipas Wall Street Journal, rendimenti 10-vjeçar u rrit nga 5.18% e së premtes, ndërsa gjatë seancës së të hënës arriti deri në 5.272%, duke iu afruar rekordit më të lartë në 24 vjet. Rritja e rendimenteve reflekton frikën e investitorëve se inflacioni do të mbetet i lartë dhe se Rezerva Federale mund ta shtrëngojë më tej politikën monetare.

Presioni u ndie edhe te bonot afatgjata: rendimenti i bonove 30-vjeçare u rrit me 0.06 pikë përqindje në 5.561%, niveli më i lartë në 24 vjet, shton media prestigjioze financiare amerikane.

Tregjet e aksioneve nuk i rezistuan presionit. Indeksi Dow Jones ra me 0.7%, S&P 500 me 0.8% dhe Nasdaq me 0.9%, duke e nisur javën në territor negativ.

As njoftimi për një program rekord prej 150 miliardë dollarësh për blerjen e aksioneve nga Nvidia nuk mjaftoi për të ngritur tregun: aksionet e prodhuesit të çipeve u rritën, por entuziazmi nuk u përhap në sektorët e tjerë.

Çmimet e naftës u kthyen në burim shqetësimi: nafta Brent u mbyll në 105.28 dollarë për fuçi, me një rritje prej 0.9%, ndërsa luhatja u shkaktua nga titujt kontradiktorë për negociatat SHBA–Iran. Fakti që kontrata për muajin e ardhshëm tregtohet shumë mbi atë të dhjetorit tregon se furnizimet mbeten të shtrënguara, vë në dukje Wall Street Journal.