Rexhep Qose: Jorgo Bulo la pas një thesar të përjetshëm

Akademiku Rexhep Qose shprehu sot ngushëllimet e tij për ndarjen nga jeta të Profesor Doktor Jorgo Bulos.

Përmes një mesazhi drejtuar “mikut të tij të shtrenjtë”, Qosja shprehet i tronditur dhe i pikëlluar për ikjen e Bulos, ndërsa vlerëson shkrimet dhe studimet që ai la pas dhe që do të mbeten një thesar i përjetshëm.

Akademiku risjell në kujtesë 46 vitet e miqësisë me profesorin, vite që sipas tij, “nuk u luhatën nga kurrfarë tronditjesh politike e shoqërore”:

“Do të na bashkojnë si gjithmonë letërsia shqipe, historia e letërsisë shqipe, rilindja kombëtare shqiptare, rilindësit e mëdhenj që ndërtuan vetëdijen kombëtare dhe që krijuan Shqipërinë. Shkuarja jote prandaj ishte aq më tronditëse dhe aq më pikëlluese për mua. Por, shkuarja jote në largësinë e pakthim është pikëllim i përgjithshëm. Dhe është pikëllim i përgjithshëm sepse është pikëllim jo për njeriun që sundon por për njeriun që mendon.

Shkove miku im, Jorgo, me trupin tënd, por na le një thesar të përjetshëm: na le shkrimet tua, na le studimet tua, na le trajtesat tua, na le mendimet dhe vlerësimet tua të drejta, të qarta, të parimshme dhe të ndershme. Shkojnë përgjithmonë ata që harrohen por ti s’mund të harrohesh se na mbetet thesari i mendjes sate me të cilin janë pasuruar përgjithmonë shkenca shqiptare dhe mendimi kombëtar shqiptar”, thuhet në mesazhin e Qoses.