Rrahmani: Vendosja e njerëzve të LVV-së në Presidencë është shqetësuese, do t’ia vështirësojë punën Shiroka-Pulës

Deputeti i Partisë Demokratike të Kosovës (PDK), Eman Rrahmani, e ka cilësuar shqetësues angazhimin e njerëzve të lidhur me Lëvizjen Vetëvendosje në Presidencë. Në “Intervistën e javës” në KosovaPress, ai tha se kjo mund t’ia vështirësojë punën presidentes së sapozgjedhur, Justina Shiroka-Pula.

Sipas Rrahmanit, që nga marrja e detyrës, Shiroka-Pulën e shoqëron ish-shefja e stafit të Albulena Haxhiut, Berita Abazi, dhe ende nuk dihet nëse bëhet fjalë për një fazë tranzicionale apo për emërime të plota të kabinetit. Ai pretendon se kryeministri Albin Kurti dërgon njerëz në Presidencë për të marrë informacione dhe për të ushtruar kontroll mbi zhvillimet brenda institucionit.

Rrahmani tha se nuk ndihet pishman që votoi Shiroka-Pulën presidente, pasi e njihte si ish-zyrtare të PDK-së, por pretendon se propozimi i saj ishte një taktikë e Kurtit për të përçarë PDK-në — ashtu siç, sipas tij, ndodhi me LDK-në me propozimin e Bekim Sejdiut. Deputeti i PDK-së pretendon gjithashtu se Kurti, në bisedat me Bedri Hamzën, u përpoq të mbillte frikë duke i thënë se nuk i ka 22 deputetë me vete.

Lidhur me ligjin që synon ndryshimin e Ligjit për Dhomat e Specializuara, Rrahmani thotë se PDK-ja beson se ai është hartuar në përputhje me Kushtetutën. Ai kërkoi që protestat në mbështetje të ish-krerëve të UÇK-së të vazhdojnë, duke theksuar se partia e tij do të jetë përkrah tyre.