Familjari i viktimave të krimit në Livoç të Gjilanit: shkaku i vrasjes së dyfishtë dyshohet të ketë qenë xhelozia

Detaje të reja zbulohen nga vrasja e dyfishtë që tronditi të premten fshatin Livoç i Poshtëm të Gjilanit. Një familjar i afërt i viktimave ka thënë për KosovaPress se më herët nuk kishin pasur probleme të mëdha, ndërsa sipas tij, shkak i ngjarjes dyshohet të ketë qenë xhelozia e bashkëshortit të viktimës.

Siç njofton KosovaPress, familjari ka treguar gjithashtu se djali i vrarë — vëllai i gruas së vrarë — ishte djali i vetëm i familjes. Ndërkohë, është bërë e ditur se ceremonia e varrimit e të dy viktimave pritet të mbahet të dielën.

Kujtojmë se të premten, në fshatin Livoç i Ulët të Gjilanit, dy persona mbetën të vrarë dhe një tjetër u plagos, pasi dyshohet se u qëlluan me armë zjarri nga bashkëshorti i njërës prej viktimave. Viktimat që humbën jetën janë bashkëshortja e të dyshuarit dhe vëllai i saj, ndërsa i plagosur ka mbetur djali i axhës së bashkëshortes, siç raportohet në raportin 24-orësh të Policisë së Kosovës.

Për rastin, Policia e Kosovës ka ndaluar personin e dyshuar, ndërsa Prokuroria Themelore në Gjilan ka nisur hetimet për zbardhjen e plotë të rrethanave të vrasjes së dyfishtë.