Rrathët 175.000 vjeçare të neandertalëve çudisin shkencëtarët

Ndryshe nga ç’mendonin shkencëtarët, neandertalët punonin në grup për të ndërtuar simbole që 175.000 vjet më parë… por ç’kuptim kishin këta rrathë?

300 metra në thellësi të një shpelle shumë të errët, 50 km larg Tuluzës, në Francë, shkencëtarët kanë zbuluar gjashtë struktura të lashta në formë rrethi të ndërtuara me stalagmitet që gjenden rrotull nëpër shpellë.

Shpella është aq thellë sa neandertalët do t’i kenë punuar me pishtarë, dhe puna e bërë tregon që dinin të punonin në grup, por pyetja është se për çfarë i bënin këto rrathë? Dhe pse kaq thellë, kaq në fshehtësi dhe në errësirë?

Përgjigjja më e natyrshme është që mund të jenë simbole të lidhura me besimin apo organizimin mes tyre, por kjo do të thoshte që kushërinjtë e largët të njeriut modern nuk kanë qenë dhe aq “të trashë” sa ç’mendonin shkencëtarët deri më sot.

Ky zbulim vërteton që neandertalët që jetonin në Europë para se homo sapiensët të vinin në kontinent, kanë ditur të organizohen, të komunikojnë dhe të ndërtojnë struktura komplekse.

Ndërkohë, shkencëtarë të tjerë që janë skeptikë, thonë që ndërtimi i rrathëve nuk do të thotë gjë për inteligjencën e tyre, pasi ka shumë kafshë që pëlqejnë të ndërtojnë struktura me formë të rregullt.