Rritja e taksës për depozitat, deputetët e Komisionit të Ekonomisë shprehin rezerva

Vendimi i qeverisë për të rritur me 5 për qind nga 10-15 % të ardhurat nga depozitat, u kundërshtua të premten nga deputetë të Komisionit Parlamentar të Financave. “Nga kjo masë preket vetëm një segment i caktuar që duhet të nxitet drejt investimit. Nga përllogaritjet del se 4.3 % e depozituesve kanë rreth 60 % të totalit te depozitave dhe pikërisht mbi këta bie barra”, deklaroi ministri i Financave, Cani. “Duke qënë se kjo është pjesë e biznesit potencial, kërkojmë të dalë nga sistemi i depozitave dhe të investojë në ekonomi, duke prodhuar vende pune”, theksoi ai.

Ndryshe nga argumentimet e ministrisë së Financave se kjo masë do të ndikojë pozitivisht në ekonomi pasi nxit investimet dhe rrit likuiditetin në treg, disa prej anëtarëve të Komisionit të Ekonomisë i druhen efektit të kundërt që kjo masë mund të japë. Ata shprehin dyshim se kjo masë do të cojë në nxjerrjen e depozitave nga sistemi bankar.
Pas rezervave të shprehura nga deputetët e mazhorancës, edhe zëvendësministri i Financave, Ervin Mete, tha se kjo masë vjen e paralajmëruar që një vit më parë, kur u ndryshua modeli i taksimit mbi të ardhurat.

Paketa e re fiskale parashikon një serë ndryshimesh ligjore, nga të cilat 13 masa shtojnë të ardhurat në arkën e shtetit ndërsa 11 krijojnë lehtësi fiskale për qytetarët. Një nga këto masa që shton të ardhurat në arkën e shtetit është edhe rritja nga 10 në 15 për qind e taksimit mbi të ardhurat nga qeratë apo depozitat bankare.