Rubio: Marrëveshje me Iranin e pamundur nëse vendoset “sistem pagese” në Hormuz

Një marrëveshje diplomatike midis Shteteve të Bashkuara dhe Iranit do të ishte e pamundur nëse Teherani do të zbatonte një sistem “pagese” në Ngushticën e Hormuzit , tha Sekretari i Shtetit i SHBA-së, Marco Rubio.

Kjo deklaratë nga kreu i diplomacisë amerikane vjen ndërsa një raport i Bloomberg raportoi se Irani dhe Omani po diskutojnë krijimin e një mekanizmi të përhershëm sigurie për Ngushticën e Hormuzit.

“Irani dhe Omani duhet të mobilizojnë të gjitha burimet e tyre si për të ofruar shërbime sigurie ashtu edhe për të menaxhuar lundrimin në mënyrën më të përshtatshme”, tha në një intervistë ambasadori iranian në Francë, Mohammad Amin-Nejad.

“Kjo do të sjellë kosto dhe është e vetëkuptueshme që ata që dëshirojnë të përfitojnë nga tranziti përmes Ngushticës do të duhet të paguajnë pjesën e tyre “, theksoi ai, duke shtuar se sistemi do të jetë transparent.

“Dhe nëse sot ekziston një dëshirë e vërtetë për të përmirësuar situatën, duhet të gjendet një zgjidhje që adreson rrënjën e problemit”, përfundoi ai.