Samiti i NATO-s mbahet në Shqipëri në 2027-n/ Rama: Moment krenarie, u bë e mundur pas shumë vitesh punë

Kryeministri Edi Rama e ka cilësuar si një moment krenarie vendimin e Aleancës së Atlantikut të Veriut që samiti i ardhshëm i NATO-s do të organizohet në Shqipëri.

Në një postim në rrjetin social Facebook, Rama shkruan se pas “viteve me shumë punë e durim të madh”, “e paimagjinueshmja bëhet e mundur”.

“Ai momenti i krenarisë kur të bëhet zemra mal, pasi kalojnë vite me shumë punë e durim të madh dhe vjen dita kur e paimagjinueshmja bëhet e mundur, e i thua Sekretarit të Përgjithshëm të NATO-s: shihemi në Shqipëri për samitin e ardhshëm ”, shkruan Rama, i cili postimin e shoqëron me një foto miqësore me Sekretarin e Përgjithshëm të NATO-s, Mark Rutte.

Ndërkaq, mw herwt, ishte vetw Sekretari i Përgjithshëm i NATO-s, Mark Rutte, i cili njoftoi se samiti i ardhshëm i Aleancës së Atlantikut të Veriut do të organizohet në Shqipëri.

Deklarata u bë në përfundim të Samitit të NATO-s në Ankara, ku liderët e 32 vendeve anëtare diskutuan mbi sigurinë euroatlantike, rritjen e investimeve në mbrojtje dhe sfidat me të cilat përballet Aleanca.

I pyetur nga gazetarët për vendin pritës të samitit të ardhshëm, Rutte u shpreh: “Samiti i ardhshëm i NATO-s do të jetë në Shqipëri. Ky është vendimi në Hagë, por edhe në Ankara. Kështu që do të vendosim edhe për kohën ekzakte se kur do të mbahet”.

Shqipëria u bë anëtare e plotë e NATO-s në vitin 2009, ndërsa pritet që vitin e ardhshëm, samiti të sjellë në vend liderët nga vendet anëtare të aleancës, duke e vendosur Shqipërinë në qendër të vëmendjes globale për çështjet e sigurisë dhe mbrojtjes.