Sanksionet e reja kundër Rusisë do të kenë impakt negativ për BP-në

Grupi britanik i naftës, “British Petrolium” (BP) theksoi sot se vendosja e sanksioneve të reja perëndimore kundrejt Rusisë ose kompanisë publike ruse Rosneft, ku BP-ja është aksionere, mund të kenë një impakt negativ mbi aktivitetin dhe rezultatet e saj.

“Nëse vendosen sanksone të reja ndërkombëtare ndaj Rosneft ose kundër Rusisë, kjo mund të ketë efekte negative të konsiderueshme mbi marrëdhëniet tona me Rosneft dhe investimet tona në këtë ndërmarrje, mbi objektivat tona strategjike në rusi si dhe mbi gjendjen tonë financiare dhe në rezultatet e veprimeve tona”, njoftoi kompania para publikimit të rezultateve financiare për këtë gjashtëmujor.

BP-ja ka 19,75 për qind të Rosneft, ndërsa shumicën e aksioneve të kësaj kompanie i ka shteti rus.

Por BP-ja shpalli sot një rritje me 65 për qind të të ardhurave të saj neto në 3,369 miliardë dollarë në gjashtëmujorin e dyte falë nivelit të mirë të çmimit për fuçi nafte. Ndërsa aksionet e saj u rriten sot me 0,44 për qind në bursën e Londrës.