SATTLER U BËN THIRRJE DEPUTETËVE TË MBËSHTESIN NDRYSHIMET KUSHTETUESE

_{Foto: Qeveria e Malit të Zi / Vlada Crne Gore}

Ambasadori i Bashkimit Evropian në Mal të Zi, Johan Sattler, u ka bërë thirrje pushtetit dhe opozitës që të mbështesin ndryshimet kushtetuese dhe të përshpejtojnë reformat e nevojshme për anëtarësimin në BE.

Ai theksoi se, pas mbylljes së përkohshme të tre kapitujve të rinj negociues, Mali i Zi është më pranë se kurrë realizimit të synimit evropian, por nevojiten vendime konkrete, përfshirë emërimin e anëtarëve të munguar të Këshillit Gjyqësor dhe themelimin e Komisionit Qendror të Zgjedhjeve.

Sattler vlerësoi se mekanizmi i propozuar për kontrollin e integritetit përbën një standard të mirëfilltë evropian, ndërsa u bëri thirrje deputetëve të të dyja palëve të angazhohen për dialog dhe kompromis në interes të qytetarëve.

“Mali i Zi nuk duhet të rrezikojë që atë që është pothuajse e arritur ta lërë në gjysmë”, theksoi Sattler, duke shtuar se tani është koha për unitet dhe rezultate.