«Saw 11» zbulon teaser-in e parë: Jigsaw kthehet me mesazhin «The Game Continues»

Është publikuar teaser-i i parë zyrtar i “Saw 11”, kapitulli i ri i franshizës legjendare të hororit, duke ndezur menjëherë entuziazmin e fansave. Në video, Jigsaw shfaqet duke iu afruar ngadalë kamerës me biçikletën e tij të famshme lodër, në një dhomë të errët me mure betoni. Pasi shikon drejtpërdrejt në kamerë, ai shqipton fjalët e tmerrshme «The Game Continues» — Loja vazhdon — përpara se të qeshë keqdashësisht jashtë kuadrit.

Teaser-i rezervon edhe një surprizë për syrin e vëmendshëm. Kamera zbret në dysheme dhe tregon një broshurë skenari ku lexohet qartë «Untitled Saw», ndërsa në këndin e poshtëm shfaqet emri i regjisorit: «Directed by Mike P. Nelson». Detaji konfirmon lajmin e djeshëm për regjisorin e ri të filmit, duke e lidhur këtë teaser drejtpërdrejt me zhvillimet më të fundit të projektit.

Mike P. Nelson, i njohur për ri-xhirimin e “Wrong Turn” (2021) dhe për horrorin “Beware Boiúna” që del në kinema më 2 tetor, merr drejtimin e kapitullit të njëmbëdhjetë të sagës. Skenarin e shkruajnë Gregory Weidman dhe Geoff Tock, ndërsa në rolin e producentëve rikthehen emra të mëdhenj: krijuesi i franshizës James Wan, Jason Blum dhe Leigh Whannell, shkrimtari i filmit origjinal. Producentë ekzekutivë janë Mark Burg, Oren Koules, Stacey Testro, Michael Clear, Judson Scott, Alayna Glasthal dhe Sarah Paek.

Deri më tani, kasti i filmit ende nuk është njoftuar zyrtarisht, por fansat shpresojnë në rikthimin e Tobin Bell në rolin ikonik të John Kramer. “Saw 11” vjen pas një periudhe të gjatë pritjeje për ndjekësit e sagës dhe premton të rikthejë frymën e lojërave vdekjeprurëse që e kanë bërë franshizën një fenomen global të hororit.

Burimi: ComingSoon.net