Senati amerikan vendos për ambasadorin e ri në Shqipëri, Eric Wendt një hap larg konfirmimit

Komiteti për Marrëdhëniet me Jashtë i Senatit të Shteteve të Bashkuara ka miratuar këtë të enjte, 4 qershor, me votim 19-3 emërimin e Eric Wendt si Ambasador i Jashtëzakonshëm dhe Fuqiplotë i SHBA-ve në Republikën e Shqipërisë.

Mbledhja ishte me dyer të mbyllura ndërsa rezultati i votimit u bë zyrtar më vonë në webin e komitetit. Fjalën e fundit tashmë do ta thotë senati amerikan. Emërimi i Wendt u mbështet nga shumica e anëtarëve të komisionit, përfshirë senatorë nga të dyja partitë kryesore në SHBA.

Nëse konfirmohet nga senati Wendt do të marrë drejtimin e Ambasadës amerikane pas një periudhë të gjatë që pas largimit të ish ambasadores Yuri Kim. Kandidatura e tij ka rëndësi për ti çuar më tej marrëdhëniet SHBA-Shqipëri, veçanërisht në fushat e sigurisë, investimeve amerikane si dhe bashkëpunimit euroatlantik në kuadër edhe të samitit të ardhshëm të NATO-s në vendin tonë.

---

Kandidatura e tij u diskutua fillimisht më 20 maj në Uashington, gjatë seancës dëgjimore para Komitetit për Marrëdhëniet me Jashtë, ku ai paraqiti prioritetet e mandatit të tij të mundshëm në Shqipëri.

Në dëshminë e tij, Wendt u pyet për çështje që lidhen me luftën kundër korrupsionit, rolin e SPAK-ut, investimet amerikane në vend dhe bashkëpunimin mes Shqipërisë dhe SHBA-ve në fushën e sigurisë dhe mbrojtjes.

Seanca e radhës do të zhvillohet me dyer të mbyllura, ku anëtarët e komitetit diskutojnë dhe votojnë për kandidaturat përpara se ato të kalojnë në seancë plenare të Senatit.

Eric Wendt është një emër i njohur në fushën e sigurisë dhe mbrojtjes. Ai ka mbajtur gradën e gjeneralit me tre yje në ushtrinë amerikane dhe ka drejtuar operacionet speciale të SHBA-ve dhe NATO-s në Europë. Gjithashtu, ai ka pasur bashkëpunim të vazhdueshëm me institucionet shqiptare të sigurisë në kuadër të NATO-s dhe misioneve ndërkombëtare në Afganistan.

Nëse konfirmohet si ambasador në Tiranë, Wendt ka deklaruar se do të fokusohet te lufta kundër korrupsionit dhe krimit të organizuar, forcimi i partneritetit ushtarak mes dy vendeve, mbështetja për sigurinë kibernetike dhe nxitja e investimeve amerikane në Shqipëri.

Ai ka shprehur gjithashtu mbështetje për punën e SPAK-ut, duke theksuar rëndësinë e forcimit të shtetit të së drejtës dhe garantimit të një klime të ndershme konkurruese për investitorët e huaj.

Në rast se kandidatura e tij miratohet nga komiteti, emri i Eric Wendt do t’i kalojë Senatit amerikan për votimin final, duke e afruar atë edhe më shumë me postin e ambasadorit të ri të SHBA-ve në Shqipëri.