Serbi, Vuçiç përplaset me pushtetin vendor të Beogradit

Kryeministri serb Aleksandar Vuçiç ka akuzuar krerët e pushtetit vendor të Beogradit, të cilët për “motive të qarta” shkaktuan shkatërrimin e një ndërtese në kryeqytet.
Natën e 25 prillit, një grup prej 30 personash të armatosur me shkopinj bejzbolli bastisën ndërtesa të ndryshme në Beograd, duke përdorur edhe pajisje të rënda e duke vënë në shënjestër disa lokale.
Në një konferencë për shtyp, Vuçiç deklaroi se “zyrtarët më të lartë të qytetit” fshihen pas shkatërrimit të lagjes.
“Jam i sigurt se motivi i tyre ka qenë i qartë. Jam i sigurt se ata donin të krijonin diçka tjetër atje dhe kanë përdorur kriminelët për interesat e tyre financiare”, tha Vuçiç.
Shefi i qeverisë serbe nuk identifikoi asnjë nga zyrtarët, duke thënë se prokurorët dhe policia janë institucionet që duhet të zbulojnë më shumë detaje.
Ai tha gjithashtu se organizatorët e këtij sulmi do të përballen me pasoja ligjore, por kjo nuk do të thotë se ai ka ndërmend t’u kërkojë autoriteteve përkatëse të përshpejtojnë procesin.
Sipas agjencisë së lajmeve “KRIK”, grupi i huliganëve gjatë bastisjes dhe dëmtimit të ndërtesave sulmoi edhe kalimtarë të rastit, duke u marrë atyre telefonët dhe duke i kërcënuar që të mos denonconin gjë.