Stoltenberg: Investimi në bazën ajrore të Kuçovës rrit sigurinë ajrore të Shqipërisë
Sekretari i Përgjithshëm i NATO-s, Jens Stoltenberg u shpreh sot në deklaratën e përbashkët për mediet me Presidentin Bajram Begaj nga selia e NATO-s, se Aleanca po investon në Bazën Ajrore të Kuçovës, që do të rrisë sigurinë e hapësirës ajrore të Shqipërisë.
Ndërkaq, edhe Presidenti Bajram Begaj në deklaratën e tij vuri në dukje se ka diskutuar me Sekretarin e Përgjithshëm Stoltenberg lidhur me ecurinë e punimeve në Bazën Ajrore Taktike të Kuçovës, të cilat po ecin sipas programit të miratuar.
Ai theksoi se Shqipëria ka rritur buxhetin e mbrojtjes në 1.86 % të produktit të brendshëm bruto.
“Parashikojmë që vitin e ardhshëm të arrijmë nivelin 2 %. Ndërkohë, Shqipëria do të vijojë modernizimin e Forcave të Armatosura dhe pajisjen me kapacitete të reja luftimi, mbështetjes me luftim dhe kapacitete logjistike”, u shpreh Begaj.
Qeveria shqiptare, vuri në dukje ai, ka shprehur ambicien, ka paraqitur projektin dhe mirëpret një prezencë detare të NATO-s në portin e ri në Porto Romano.
“Ky port baze detare siguron prezencë detare për Aleancën në rajonin Adriatiko-Jonian, gjithashtu edhe akses në akset kryesore të Korridorit 8. Kjo ndihmon në rritjen e shpejtësisë dhe lëvizshmërisë së Aleancës në krahun lindor dhe Ballkanin Perëndimor”, përfundoi Begaj.
