SHBA, hakerat kinezë hyjnë në të dhënat e mbi 4 milionë punonjësve të qeverisë

Agjencitë qeveritare amerikane janë goditur nga një sulm i madh kibernetik, ku hakerat kanë arritur të futen në sistemin e të dhënave të miliona punonjësve aktualë federalë, por edhe të larguarve nga puna.

Byroja Federale e Hetimeve tha se kishte nisur menjëherë një hetim për gjetjen e përgjegjësve të këtij sulmi masiv. Ndërkohë, hetuesit besojnë se përgjegjëse kryesore për këtë shkelje masive të sistemit të të dhënave federale është qeveria kineze, – ka thënë një zyrtar i zbatimit të ligjit për CNN.

Rasti është konfirmua të enjten nga Zyra e Menaxhimit të Personelit, e cila merret me hartimin e të dhënave të punonjësve të qeverisë federale.

Një zyrtar amerikan tha se hakerat kanë arritur të hyjnë në sistemin kompjuterik të Zyrës së Menaxhimit të Personelit, në të dhënat e ruajtura në departamentin e brendshëm, që është një qendër e përbashkët e shërbimit për agjencitë federale. Ai nuk komentoi më tej nëse janë prekur edhe të dhënat e agjencive të tjera.

“Në informacionin e ruajtur në bazat e të dhënave përfshihen detyra të punës për punonjësit, komente në lidhje me performancën dhe trajnimin e tyre”, thanë zyrtarët.

Në prillin e këtij viti, duke përdorur një sistem të ri të sigurisë kibernetike të njohur si “Einstein”, Zyra e Menaxhimit të Personelit zbuloi një tjetër ndërhyrje kibernetike, për të cilën FBI-ja tha se është duke e hetuar.

Ken Ammon, shefi i “Xceedium”, një kompanie e sigurisë kibernetike, paralajmëroi se të dhënat e hakuara mund të përdoren për shantazh ndaj punonjësve federalë, për të arritur në informacione të rëndësishme.