SHBA hetoi një komplot të dyshuar spiunazhi kinez ndaj drejtorit të Nvidia-s, Jensen Huang

Një drejtuese e lartë e Megaspeed, kompani singaporiane e shërbimeve cloud për inteligjencën artificiale e akuzuar më parë për shitje të paligjshme të çipave të Nvidia-s drejt Kinës, mund të ketë qenë edhe spiune kineze, i thanë burime anonime gazetës New York Times, siç njofton TechCrunch, duke iu referuar New York Times.

Drejtuesja, Alice Huang (e njohur edhe si Huang Le), është fotografuar në disa darka biznesi në rajonin e Singaporit përkrah drejtorit ekzekutiv të Nvidia-s, Jensen Huang; agjencitë amerikane të inteligjencës e kanë mbajtur nën vëzhgim për rreth një vit për të mësuar më shumë rreth lidhjeve të saj me Kinën.

Shqetësimi i burimeve ishte se Alice Huang i ishte afruar aq shumë Jensen Huang-ut, sa mund të mblidhte informacion për planet e Nvidia-s dhe përpjekjet e drejtorit për të bindur administratën Trump që të lejojë dërgimin e teknologjisë më të avancuar drejt Kinës.

Një zëdhënës i Nvidia-s i hodhi poshtë dyshimet, duke i thënë TechCrunch se marrëdhënia e drejtorit me drejtuesen e Megaspeed nuk ndryshon nga ajo me çdo klient tjetër rajonal: “Takimet me klientët janë pjesë e punës së një drejtori ekzekutiv; Jensen flet me mijëra drejtues klientësh çdo vit”. Kompania shtoi se klientët rajonalë cloud marrin vetëm informacion të zakonshëm biznesi — jo sekrete tregtare të Nvidia-s dhe zero informacion me rëndësi për sigurinë kombëtare.

Në vitin 2025, siç kishte raportuar New York Times, Departamenti amerikan i Tregtisë hetoi Megaspeed nga shqetësimi se kompania ndihmonte firmat kineze të anashkalonin rregullat e eksportit të çipave të AI duke i rishitur çipa të kufizuar; Alice Huang thuhej se ishte atëherë një drejtuese e lartë e kompanisë.