SHBA kundër lirimit të kreut të organizatës terroriste “17 Nëntori”: Rikthejeni në burg

Shtetet e Bashkuara kanë kritikuar vendimin e një gjykate greke për lirimin e Aleksandros Giotopulos, udhëheqësit të dënuar të organizatës terroriste tashmë të shpërbërë “17 Nëntori”, duke i bërë thirrje autoriteteve greke që të sigurojnë rikthimin e tij në burg.

Në një deklaratë të 29 majit, Departamenti Amerikan i Shtetit tha se ishte “thellësisht i zhgënjyer” nga vendimi i Gjykatës së Apelit të Pireut për t’i dhënë Giotopulosit lirim me kusht.

Giotopulos u dënua në vitin 2003 si drejtuesi dhe ideatori kryesor i organizatës terroriste greke të ekstremit të majtë “17 Nëntori”, e cila për dekada kreu atentate dhe sulme me bomba. Ai u dënua me 17 burgime të përjetshme dhe 25 vite të tjera burg.

82-vjeçari u lirua nga një burg në Athinë më herët gjatë këtij muaji, pasi një trupë gjyqësore miratoi lirimin e tij me kusht, duke marrë parasysh moshën e avancuar.

Departamenti i Shtetit kujtoi se organizata kishte vrarë katër punonjës të qeverisë amerikane — shefin e stacionit të CIA-s Richard Welch, kapitenin e Marinës George Tsantes, kapitenin e Marinës William Nordeen dhe rreshterin e Forcave Ajrore Ronald Stewart — si dhe një atashe ushtarak britanik, një punonjës të ambasadës turke dhe disa personalitete të njohura greke.

“Ne mbështesim fuqimisht” përpjekjet për rrëzimin e këtij vendimi, deklaroi Departamenti i Shtetit, duke iu referuar ankimit të paraqitur më 25 maj nga zëvendësprokurori i Gjykatës së Lartë greke, i cili kërkon anulimin e lirimit me argumentin se Giotopulos nuk ka vuajtur afatin minimal të kërkuar të dënimit.

SHBA i bëri thirrje qeverisë greke “të bëjë gjithçka që ka në dorë për ta rikthyer Giotopulosin në burg”.

Departamenti i Shtetit theksoi gjithashtu se Giotopulos nuk ka pranuar kurrë përgjegjësinë për vrasjet dhe nuk ka shprehur pendesë, duke nënvizuar se “terrorizmi nuk duhet të tolerohet apo të justifikohet kurrë”.

Lirimi i tij ka rikthyer vëmendjen mbi një nga organizatat militante më famëkeqe të Evropës, e cila kreu atentate dhe sulme me bomba për gati tre dekada, deri sa u shkatërrua nga autoritetet greke në vitin 2002.