SHBA propozon takim trepalësh Ukrainë–Rusi në Emiratet e Bashkuara Arabe, thotë Zelenski

Presidenti ukrainas Volodymyr Zelensky njoftoi të premten se Shtetet e Bashkuara kanë propozuar që Emiratet e Bashkuara Arabe të presin një takim trepalësh me Ukrainën dhe Rusinë, në nivel teknik, me synim dhënien fund të luftës katërvjeçare e gjysmë.

Zelensky e bëri njoftimin gjatë një takimi me gazetarët përmes platformës WhatsApp. “Pala amerikane ka propozuar një takim në nivel teknik në format trepalësh”, tha presidenti ukrainas, duke shtuar se Kievi pret nga Uashingtoni propozimin për datën e takimit dhe se Emiratet e Bashkuara Arabe janë sugjeruar si vend i mundshëm i zhvillimit të tij.

Njoftimi vjen pas bisedimeve që Zelensky zhvilloi me presidentin amerikan Donald Trump në margjinat e Asamblesë së Përgjithshme të OKB-së në Nju Jork, si dhe pas takimeve të negociatorëve ukrainas me homologët e tyre amerikanë. “Do t’i informojmë dhe diskutojmë këto detaje me palën evropiane, amerikanët do të flasin me rusët, dhe do të kthehemi për 10 ditë me një perspektivë të re ose një rezultat”, deklaroi Zelensky.

Kremlini reagoi të premten duke thënë se një takim trepalësh me Ukrainën dhe Shtetet e Bashkuara “mund të ndodhë së shpejti”. Zelensky tha gjithashtu se i kishte kërkuar presidentit Trump ta ngrinte çështjen e luftës në Ukrainë gjatë takimit me presidentin kinez Xi Jinping, i cili po zhvillon një vizitë shtetërore në SHBA.

Sipas presidentit ukrainas, Kievi pret ende përgjigje nga ekipi amerikan, veçanërisht lidhur me përpjekjet për uljen e tensioneve para dimrit. Ai paralajmëroi gjithashtu partnerët evropianë se Rusia do të vazhdojë sulmet hibride kundër tyre, duke shtuar se Ukraina u ka ofruar ndihmë Evropës — ndërkohë që Kremlini i ka mohuar aktet e sabotimit në Evropë.

Burimi: Reuters