SHBA – Rezultatet e para konfirmojnë bastionet e dy partive

Duke bërë një fushatë të fortë kundër inflacionit, J.D Vance, një nga mbështetësit e  miliarderit republikan, zuri vendin e lakmuar të senatorit në Ohajo – një nga bastionet industriale dhe bujqësore të Amerikës.

I goditur nga një rritje rekord çmimesh në vend, Joe Biden mund të humbasë kontrollin e Dhomës së Përfaqësuesve dhe Senatit në këto zgjedhje afatmesme, tradicionalisht të pafavorshme për partinë në pushtet dhe ta shohë pushtetin e tij të paralizuar për dy vitet e ardhshme.

Paraardhësi i tij Donald Trump, i cili mbështeti fuqishëm një numër të madh kandidatësh republikanë – ai ishte në një takim dje në mbrëmje në Ohajo, po mbështet suksesin e mbështetësve të tij për ta nisur më mirë garën në zgjedhjet presidenciale të 2024-ës.

Ai premtoi për një njoftim shumë të madh më 15 nëntor.

Miliarderi 76-vjeçar donte të ishte i pranishëm edhe gjatë kësaj nate zgjedhore, duke bërë një deklaratë të shkurtër televizive për të uruar veten për suksesin e disa prej kandidatëve të tij të shumtë.

Por, edhe kampi i demokratëve nuk mbeti duarbosh.

Ai ”rrëmbeu” dy guvernatorë nga republikanët, në Merilend dhe Masaçusets, ku Maura Healey do të jetë lezbikja e parë në krye të një shteti.

Biden e telefonoi menjëherë për ta uruar.

Partia e liderit demokrat 79-vjeçar mban sërish kontrollin e shtetit të Nju Jorkut, ku republikanët besonin se mund të rrëzonin guvernatoren Kathy Hochul.

Vala gjigante e kuqe – ngjyra e republikanëve – e premtuar nga Donald Trump, nuk është konkretizuar ende.

“Sigurisht që nuk është një valë republikane, kjo është e sigurt”, tha senatori me ndikim Lindsey Graham, një mik i ngushtë i ish-presidentit, në NBC.

Kontrolli i Senatit është edhe më i pasigurt. Gjithçka do të varet nga disa shtete kyçe, si Xhorxhia, Arizona dhe Pensilvania.