Shefi i IEA-së: Tregjet e energjisë nuk do të kthehen në nivelet e para luftës as në vitin 2027

Tregjet botërore të energjisë nuk pritet të kthehen në nivelet e para luftës as gjatë vitit 2027, paralajmëroi drejtori ekzekutiv i Agjencisë Ndërkombëtare të Energjisë, Fatih Birol. Siç njofton Al Jazeera, Birol e bëri deklaratën në Javën Ndërkombëtare të Energjisë në Singapor, ku tha se nuk sheh asnjë rrugë të besueshme që tregjet të rikthehen vitin e ardhshëm në gjendjen para nisjes së luftës SHBA–Izrael ndaj Iranit në fund të shkurtit.

Birol u bëri thirrje qeverive dhe bizneseve ta vendosin sigurinë energjetike në krye të prioriteteve, ndërsa planifikojnë hapat e ardhshëm. Sipas tij, konflikti e ka shtrënguar ndjeshëm një treg që më parë pritej të ishte në tepricë, ka ndërprerë rrjedhat globale të energjisë dhe ka ngritur çmimet e naftës dhe të produkteve të rafinuara.

Paralajmërimi vjen ndërsa Ngushtica e Hormuzit, arteria kryesore e eksporteve të naftës nga Gjiri, mbetet pothuajse e bllokuar dhe çmimi Brent, pasi preku nivelet më të larta në gati gjashtë muaj javën e kaluar, u tërhoq në 115.16 dollarë për fuçi. Vlerësimi i kreut të IEA-së nënvizon se, edhe nëse luftimet ndalen, pasojat energjetike të luftës do të ndjehen gjatë gjithë vitit të ardhshëm.