Shifra rekord për Interin: 518 milionë euro të ardhura dhe 22,7 milionë euro fitim

Bordi i Drejtorëve të Interit miratoi projekt-pasqyrat financiare për vitin fiskal 2025/26 gjatë një mbledhjeje të mbajtur sot në selinë e klubit. Pasqyra e të ardhurave për sezonin 2025/26 tregon të ardhura prej 518 milionë eurosh, duke shënuar rezultatin e dytë më të mirë në historinë e klubit – i tejkaluar vetëm nga rekordi i vendosur sezonin e kaluar (567 milionë euro), i cili u nxit nga të ardhurat e jashtëzakonshme prej pjesëmarrjes në Kupën e Botës për Klube të FIFA-s dhe arritjes në finalen e Ligës së Kampionëve.

“Projekt-pasqyrat financiare tregojnë një rezultat pozitiv me një fitim neto prej 22,7 milionë eurosh,” thuhet në deklaratën e klubit zikaltër. “Kjo shifër u arrit falë të ardhurave të qëndrueshme dhe uljes së kostove të prodhimit me rreth 20 milionë euro, ose 4%. Të ardhurat komerciale u rritën me 7%, të nxitura kryesisht nga rritja e shitjeve të produkteve të markës (merchandising) – e mbështetur nga modeli i ri i biznesit i zbatuar me partnerin Fanatics – ndërsa u rritën edhe të ardhurat nga ditët e ndeshjeve për çdo event.

Të ardhurat nga transferimet e lojtarëve u rritën me 11 milionë euro, krahas një uljeje prej 8 milionë eurosh në amortizimin dhe zhvlerësimin e të drejtave shumëvjeçare të regjistrimit të lojtarëve.

Performanca e Grupit për vitin fiskal bëri të mundur që kapitali neto të kthehej në vlera pozitive, duke arritur në 10,4 milionë euro dhe duke u rimëkëmbur kështu nga një pozicion negativ prej 12 milionë eurosh në mbylljen e llogarive të sezonit 2024/25.”