Shpërthen bombola e gazit në ballkon. Shpëton mrekullisht një familje në Lushnjë

Një bombol gazi ka shpërthyer në një apartament në Lushnjë. Ngjarja ka ndodhur rreth orës 15:30 në një banesë në katin e katërt të një pallati në qytetin e Lushnjës.

Mësohet se nga shpërthimi i bombolës, e cila përdorej për gatim, nuk ka persona të lënduar, por vetëm dëme materiale.

Fillimisht bombola, e cila ishte vendosur në aneksin e improvizuar në ballkonin e shtëpisë, ka marrë flakë, e më pas ka shpërthyer. Në këtë moment banorët e shtëpisë kanë dalë jashtë, e fatmirësisht kanë shpëtuar pa lëndime.

Sakaq, në vendngjarje kanë mbërritur forcat policisë, dhe kanë nisur hetimet për zbardhjen e plotë të rrethanave të ngjarjes.