Shpërthimi në rafinerinë greke, humb jetën edhe punëtori i dytë shqiptar! 4 të arrestuar

Ka ndërruar jetë edhe shqiptari tjetër i cili u plagos rëndë pak ditë më parë pas një shpërthimi në një rafineri në Greqi. 50-vjeçari, Dorian Hysa mori plagë të rënda dhe nuk arriti t’iu mbijetonte plagëve. Nga kjo ngjarje ka ndërruar jetë edhe 43-vjeçari Robert Cakaj.

Lidhur me ngjarjen, policia ka nisur hetimet për masat e sigurisë gjatë punimeve të mirëmbajtjes. Autoritetet gjithashtu kanë arrestuar 4 persona të cilët ishin të përfshirë drejtpërdrejt në mbikëqyrjen e projektit kontrovers.

Konkretisht, ata janë një kryepunëtor 36-vjeçar, një menaxher i Departamentit të Shëndetit dhe Sigurisë dhe një operator projekti. Këto 3 arrestime vijnë pas arrestimit të kontraktorit të punishtes së jashtme, i cili po kryente punime brenda rafinerisë në kohën e aksidentit.