Shqipëria dhe Kosova, ura bashkëpunimi në fushën e bujqësisë

Ambasadori i Shqipërisë në Kosovë, Qemal Minxhozi, i shoqëruar nga disa ekspertë të Ministrisë së Bujqësisë së Shqipërisë dhe drejtuesit e sektorit të bujqësisë të qarqeve Dibër dhe Kukës, vizituan komunën e Kamenicës.

 Sipas burimeve nga ambasada e Shqipërisë në Kosovë, pas takimit me kryetarin e komunës, Begzad Sinani, ambasadori Minxhozi dhe ekspertët e bujqësisë, vizituan ndërmarjen “Fungo FF”, e cila merret kryesisht me mbjelljen dhe përpunimin e kërpudhave por dhe frutave të ndryshme.

Qëllimi i kësaj vizite ishte vendosja e urave të bashkëpunimit mes kësaj komune dhe simotrave të saj në Shqipëri, kryesisht në fushën e bujqësisë.

Gjithashtu, u ra dakort që në fillim të vjeshtës së këtij viti të organizohet në qytetin e Kamenicës një panair i prodhimeve bujqësore e blegtorale.

Shqipëria dhe Kosova memorandum bashkëpunimi në bujqësi

Gjatë mbledhjes së përbashkët të Qeverisë së Shqipërisë dhe asaj të Kosovës në Tiranë ë 23 mars u nënshkrua një memorandum ndërmjet Ministrisë së Bujqësisë, Zhvillimit Rural dhe Administrimit të Ujërave të Republikës së Shqipërisë dhe Ministrisë së Bujqësisë, Pylltarisë dhe Zhvillimit Rural të Republikës së Kosovës për Bashkëpunimin në Fushën e Bujqësisë dhe Zhvillimit Rural.

Ky memorandum synon forcimin dhe nxitjen e mëtejshme të bashkëpunimit në fushën e bujqësisë dhe zhvillimit rural. Do të krijohet një Grup Pune i cili do të hartojë planin e veprimit për zbatimin e Memorandumit.