Goditje me armë në një sinagoge ne Michigan

Një sulmues është vrarë pas një “situate me qitës aktiv” në një sinagogë në zonën metropolitane të Detroitit, në shtetin e Michiganit, sipas autoriteteve.

Forcat e rendit u drejtuan me urgjencë drejt Temple Israel Synagogue në West Bloomfield Township, Michigan, të enjten pas incidentit, të cilin drejtori i FBI-së, Kash Patel, e përshkroi si një “sulm të dukshëm me përplasje automjeti dhe situatë me qitës aktiv”.

Sherifi i qarkut Oakland, Mike Bouchard, u tha gazetarëve se një makinë ishte përplasur në sinagogë, e cila strehon gjithashtu një qendër edukimi të hershëm për fëmijë. Më pas drejtuesi i automjetit u përfshi në shkëmbim zjarri me sigurimin e objektit.

“Sigurimi e pa dhe u përfshi në shkëmbim zjarri me të”, tha Bouchard.

Sulmuesi u gjet më vonë i vdekur brenda automjetit, i cili kishte marrë flakë, shtoi ai. Shkaku i vdekjes nuk ishte menjëherë i qartë.

Sherifi tha se një anëtar i ekipit të sigurisë u godit nga makina dhe u dërgua në spital. Nuk u raportua për të plagosur të tjerë.

Video nga vendi i ngjarjes tregojnë një reagim të madh të policisë dhe tym që dilte nga ndërtesa.

Autoritetet thanë se po kontrollonin ende zonën për ndonjë mjet shpërthyes të mundshëm.

Trump informohet për incidentin

Sekretarja e shtypit e Shtëpisë së Bardhë, Karoline Leavitt, tha se presidenti amerikan Donald Trump ishte informuar për situatën.

Në një postim në X, guvernatorja e Michiganit, Gretchen Whitmer, e quajti incidentin “zemërthyes”.

“Komuniteti hebre i Michiganit duhet të jetë në gjendje të jetojë dhe të praktikojë besimin e tij në paqe,” tha ajo.

Federata Hebraike e Detroitit u dërgoi një mesazh ndjekësve të saj në internet që të shmangnin afrimin pranë sinagogës.

“Agjencitë tona hebraike janë aktualisht në izolim paraprak për arsye sigurie,” shkroi federata në Facebook. “U kërkojmë anëtarëve të komunitetit të qëndrojnë larg zonës për momentin.”

Incidenti ndodh në një kohë frike të shtuar për antisemitizëm dhe islamofobi, pas shpërthimit të luftës gjenocidale të Izraelit në Gaza në vitin 2023 dhe nisjes muajin e kaluar të një fushate të re ushtarake të Izraelit dhe SHBA kundër Iranit.

Një zyrtar i zbatimit të ligjit u tha gazetarëve të enjten se ishte lëshuar një alarm i përgjithshëm për vende të ndjeshme që nga shpërthimi i luftës me Iranin, por nuk dihej për ndonjë kërcënim specifik ndaj Temple Israel Synagogue.

Sinagoga Temple Israel u themelua në vitin 1941 dhe aktualisht ka rreth 12,000 anëtarë, sipas faqes së saj zyrtare.