“Shqipëria në një fazë të re të Forcave të Armatosura” Rama: 500 vende pune në kantierin e Pashalimanit, do trajnohen nga Fincantieri

Kryeministri Edi Rama deklaroi se Shqipëria ka hyrë në një fazë të re të zhvillimit të Forcave të Armatosura, ku përveç forcimit të kapaciteteve mbrojtëse, një objektiv i rëndësishëm është edhe rilindja e industrisë ushtarake në vend.

Gjatë shënimeve të javës, Rama tha se qeveria ka ndërmarrë një sërë hapash konkretë në këtë drejtim, ndërsa veçoi marrëveshjen e arritur këtë javë me kompaninë italiane Fincantieri, e cila është zgjeruar edhe me një partneritet me shkollën industriale “Pavarësia” në Vlorë.

“Kemi hyrë në një fazë të re të Forcave të Armatosura, ku kapitulli i ri nuk është vetëm fuqizimi i mbrojtjes, por edhe rilindja e industrisë ushtarake. Janë hedhur një sërë hapash konkretë. Këtë javë, partneriteti me Fincantierin u shtri edhe në një bashkëpunim me shkollën industriale ‘Pavarësia’ të Vlorës, pasi në kantierin e ri të Pashalimanit baza e re prodhuese do të kërkojë rreth 500 të rinj, teknikë, inxhinierë dhe specialistë të tjerë. Për këtë arsye është bërë kjo marrëveshje dhe paralelisht me nisjen e punimeve në kantier do të fillojë edhe përgatitja e të rinjve, të cilët do të trajnohen si në Pashaliman, ashtu edhe në brigjet e Italisë.”

Sipas Ramës, projekti synon jo vetëm ndërtimin e kapaciteteve të reja në industrinë detare dhe të mbrojtjes, por edhe krijimin e mundësive të reja të punësimit dhe formimit profesional për të rinjtë shqiptarë, në bashkëpunim me një nga kompanitë më të mëdha evropiane të industrisë detare.