Shqiptarët, të dytët në listën e azilkërkuesve edhe për tetorin

Shqiptarët vijojnë të mbajnë vendin e dytë në listën e azilkërkuesve në Gjermani. Ministria e Brendshme gjermane ka publikuar listën e azilkërkuesve, ku shqiptarët zënë vendin e dytë për muajin tetor. Shqiptarët renditen të dytët pas sirianëve, të cilët kryesojnë listën për numrin e madh të azilkërkuesve.

Sipas shifrave të autoriteteve gjermane, gjatë muajit tetor, 4680 persona kanë shkuar në Gjermani, ndërsa në shtator ky numër ishte 6740 persona.

Sipas të dhënave zyrtare, hartuar nga Zyra Federale, njoftohet se për tetorin aplikimet e reja njohin shifrën në total të 31 580 personave.

Krahasuar me të njëjtën periudhë të vitit të shkuar, rritja ka qenë në masën e 142.6 për qind, pra numri i të ikurve është dyfishuar.

Që nga fillimi i këtij viti, në Gjermani kanë kërkuar azil 49 692 shqiptarë, ndërkohë që për të njëjtën periudhë kohe të vitit të kaluar, kjo shifër ka qenë 6271.