Hakerët sulmojnë sistemin e Komisionit Federal të Zgjedhjeve në SHBA, del jashtë funksionit depozitimi elektronik

Faqja e Komisionit Federal të Zgjedhjeve (FEC) në Shtetet e Bashkuara është shënjestruar nga një haker ose hakerë, duke ndërprerë sistemin e depozitimit elektronik të agjencisë, siç njofton Reuters, sipas një email-i të parë nga agjencia e lajmeve. Sulmi ndodh vetëm një javë para zgjedhjeve të 3 nëntorit.

Në deklaratën e saj, FEC tha: “në këtë moment, sistemi i depozitimit elektronik i FEC është jashtë funksionit dhe stafi ynë i IT po punon aktivisht për ta rikthyer shërbimin”. Sipas mesazhit të statusit të agjencisë, sistemi është jashtë funksionit që rreth orës 22:00 ET të hënën (02:00 GMT të martën), ndërsa përdoruesit mund të kërkojnë ende në faqe raportet e kaluara. Agjencia nuk komentoi më tej.

Sulmet vijnë një javë para zgjedhjeve afatmesme, që vendosin nëse republikanët e presidentit Donald Trump i mbajnë shumicat në Kongres për dy vitet e ardhshme. FEC nuk administron zgjedhjet dhe ndërprerja nuk pritet të ndikojë në aftësinë e votuesve për të votuar.

Ndërprerja pengon organizatat të depozitojnë raportet e shpenzimeve 24-orëshe dhe 48-orëshe të FEC, që tregojnë sa shpenzojnë grupet politike në gara specifike. Steven Mele, partner në firmën MBA Consulting Group, tha: “Nuk e kam parë kurrë këtë në 26 vjet”, duke theksuar se do të ketë më pak transparencë për zgjedhjet derisa problemi të rregullohet.

Agjencia e Sigurisë Kibernetike dhe Infrastrukturës (CISA) dhe FBI nuk iu përgjigjën menjëherë kërkesave për koment.