Si u vodh thesari i Zvicrës në BSH: Morën 6 mln $, lanë libra
Zbardhet skema me të cilën u vodhën rreth 600 milionë lekë të reja, nga thesari i Bankës së Shqipërisë në Linzë.
Mimoza Bruzia dhe Ardian Bitraj, ky i fundit punonjës i thesarit që në vitin 1993, për 4 vite rresht kanë vjedhur paratë që vinin me peshë nga Zvicra duke i zëvendësuar ato me letra dhe libra.
Skema e vjedhjes u zbulua nga inspektorët e Auditit të Brendshëm të Bankës, të cilët zbuluan se disa kuti ku mbaheshin paratë ishin hapur. Brenda këtyre kutive janë gjetur në vend të parave libra.
Auditi bëri inventarin dhe zbuloi mungesën e 600 milionë lekëve të reja. Bitraj ka pranuar se paratë që merrte nga hapja e kutive të lekëve që vinin nga Zvicra, i zëvendësonte për të patur të njëjtën peshë si kuti, me libra që i fuste vetë.
Kjo skemë ka funksionuar për 4 vite rresht. Bitraj ka pranuar gjithashtu për policinë se paratë që merrte i luante në kumar dhe baste sportive, dhe se e konsideronte këtë thjesht si një mënyrë huaje për t’i zëvendësuar më vonë. Bruzia akuzohen se ka vjedhur vetëm 40 milionë lekë të reja nga shuma në total prej 600 milionë lekë të reja.
Si Bitraj dhe Bruzia, ndodhen të arrestuar me vendim gjykate për akuzat e vjedhjes, shpërdorimit të detyrës dhe falsifikimit të dokumenteve.
