Spajiq: “Modeli Euro” është i qëndrueshëm; ministri i Financave ishte i informuar para votimit

Kryeministri i Malit të Zi, Milojko Spajiq, tha se “Modeli Euro”, i cili parashikon rritjen e pagave minimale nga janari i vitit të ardhshëm, është plotësisht i qëndrueshëm. Në një intervistë për Televizionin e Malit të Zi (TVCG), ai theksoi se çdo analizë e kryer deri më tani tregon se programi nuk do të shkaktojë pasoja negative për financat publike.

Spajiq konfirmoi se ministri i Financave, Novica Vukoviq, ishte i njohur me përmbajtjen e modelit para se qeveria ta miratonte. “Ai ishte i informuar”, tha kryeministri, duke shtuar se shpesh ndodh që anëtarë të qeverisë nuk votojnë në mbledhjet telefonike “sepse nuk e shohin me kohë mesazhin”.

Kryeministri mbrojti gjithashtu heqjen e kontributeve për sigurimet shëndetësore, duke thënë se po aq e rëndësishme është edhe ndalja e largimit të fuqisë punëtore. “Nëse 150 mijë persona të aftë për punë largohen nga vendi, çfarë qëndrueshmërie kemi?”, pyeti ai, duke iu përgjigjur kritikëve që e konsiderojnë kontributin si burimin më të qëndrueshëm të të ardhurave.

Sipas modelit të miratuar, nga janari i vitit 2027 paga minimale në Mal të Zi do të shkojë në 1.000, 1.250 dhe 1.400 euro, varësisht nga niveli i arsimit. Spajiq premtoi se programi nuk do të sjellë mbyllje të bizneseve të vogla dhe se të ardhurat e pushtetit vendor nuk do të dëmtohen.

Kryeministri njoftoi se Komisioni Evropian është njoftuar për “Modelin Euro” dhe shprehu besimin se qeveria do të marrë mbështetje në parlament për miratimin e tij, duke e cilësuar modelin si investim në të ardhmen e Malit të Zi.

Burimi: Vijesti