SPANJË – Reshje të dendura: të paktën shtatë të plagosur

MADRID, 22 gusht /ATSH -DPA/ – Të paktën shtatë persona janë plagosur dhe një kamping është evakuuar pas reshjeve të dendura që përfshinë verilindjen e Spanjës gjatë natës nga e premtja në të shtunë, njoftuan autoritetet.

Tre persona u plagosën pasi një mur u shemb në portin e Roda de Berà, rreth 75 kilometra në jugperëndim të Barcelonës.

Njëri prej tyre mund të jetë në gjendje më të rëndë se të tjerët, tha Inma Solé, zëvendësdrejtoreshë rajonale për koordinimin e emergjencave, për televizionin publik spanjoll.

Katër persona të tjerë u dërguan në spital pas incidenteve të tjera. Dy prej tyre pësuan plagë të lehta kur një tjetër mur u shemb në një kamping në Roda de Berà.

Rreth 300 persona që qëndronin në këtë kamping u evakuuan, ndërsa rreth 100 prej tyre gjetën strehim në një palestër bashkiake.

Zjarrfikësit kryen më shumë se 200 ndërhyrje, ndër të tjera për të shpëtuar persona të bllokuar në automjetet e tyre nga përmbytjet.

Bregdeti i El Vendrell, një qytet me rreth 40 mijë banorë, u përmbyt nga më shumë se gjysmë metri ujë. Edhe disa rrugë në komunat e afërta të Coma-ruga dhe Torredembarra u përmbytën, raportoi televizioni publik katalanas.

Në disa zona të Katalonjës u regjistruan më shumë se 100 litra shi për metër katror, sipas shërbimit lokal meteorologjik. Në disa pika të bregdetit katalanas, reshjet iu afruan 200 litrave për metër katror brenda vetëm pak orësh.