Starmer: Rusia do të jetë në gjendje të sulmojë NATO-n nga viti 2030

Kryeministri britanik Keir Starmer ka paralajmëruar se Rusia mund ta sulmojë NATO-n që në vitin 2030. Ai ritheksoi vendosmërinë e Mbretërisë së Bashkuar për të zhvilluar aftësitë e saj ushtarake për t’u përballur me një situatë të tillë.

“Sipas vlerësimit tonë të inteligjencës, si dhe atij të vendeve të tjera të NATO-s, mund të ketë një sulm rus ndaj NATO-s që në vitin 2030”, tha ai gjatë një vizite në një kompani të industrisë së mbrojtjes në Wiltshire.“Nuk është ekzagjerim të thuhet se po jetojmë në kohën më të rrezikshme dhe të pasigurt të jetës sonë”, tha Keir Starmer, duke shtuar se ishte përgjegjësi e qeverisë së tij të jetë gati.

Mbretëria e Bashkuar, e cila ka parë kapacitetet e saj të zvogëlohen për shkak të investimeve të pamjaftueshme në mbrojtje, është zotuar të rrisë shpenzimet e saj ushtarake në vitet e ardhshme. Kryeministri britanik ka njoftuar se qeveria do të publikojë planin e saj të investimeve në mbrojtje para Samitit të NATO-s, i planifikuar për në fillim të korrikut.Plani duhej të paraqitej në vjeshtën e vitit 2025, por finalizimi i tij është vonuar për shkak të kufizimeve buxhetore të përkeqësuara nga pasojat ekonomike të luftës në Lindjen e Mesme.