SUEDI – Opozita kërkon dorëheqjen e tre ministrave lidhur me skandalin e IT-së

Qeveria e pakicës në Suedi u përball sot me një krizë politike pasi opozita ka kërkuar dorëheqjen e tre ministrave lidhur me skandalin që përfshinte një agjenci shtetërore që u jepte shërbime IT-je punonjësve të huaj pa leje zyrtare për një gjë të tillë.

“Disa ministra kanë lënë pas dore detyrat e tyre. Ky neglizhim nga ana e tyre do të ketë pasoja,” tha kreu i Partisë së Qendrës, Annie Loof.

Polemikat janë përqendruar në Agjencinë Kombëtare të Transportit, e cila në vitin 2015 i transferonte shërbimet  e saj të IT-së tek gjigandi i informacionit IBM, duke shfrytëzuar punonjës të huaj në disa vende, përfshirë Republikën Çeke, në mungesë të një leje sigurie suedeze.

Kreu i Agjencisë së Transportit u shkarkua nga detyra në janar dhe u gjobit për shkelje të rregullave të mbrojtjes së informacionit të klasifikuar.

Opozita kritikoi qeverinë se nuk ishte vënë në dijeni për shkeljen ligjore,  edhe pse ministri i Mbrojtjes dhe ministri i Brendshëm ishin të informuar rreth kësaj çështjeje që në fillim të vitit 2016.

Gjithashtu, dy anëtarët e kabinetit nuk arritën të informonin kryeministrin, Stefan Lofven i cili tha se ishte ishte bërë me dije rreth kësaj shkeljeje vetëm në janar të ketij viti.