Sulme masive me dronë ukrainas në Rusi, 7 të vrarë në Donetsk. Shpërthime edhe në Shën Petersburg

Guvernatori rajonal i Donetskut, i vendosur nga Rusia, tha të mërkurën në mëngjes se një mjet ajror pa pilot ukrainas goditi një autobus në rajonin e kontrolluar nga Rusia, duke vrarë të paktën shtatë persona dhe duke plagosur 11 të tjerë. Në të njëjtën kohë, një numër i madh dronësh ukrainas goditën Shën Petersburgun, duke shkaktuar dëme material.

Sipas asaj që tha kreu i administratës së Donetskut, Denis Pushilin, në një postim në platformën e mesazheve Telegram, droni ukrainas goditi një autobus që udhëtonte nga Moska për në Simferopol në Krimenë gjithashtu të pushtuar.

“Në Genakiyo, një dron sulmoi një autobus që operonte në linjën Moskë-Simferopol. Sipas informacioneve paraprake, shtatë civilë u vranë”, shkroi Pushilin.

Ndërkohë, mbrojtja ajrore ruse u përball me një tufë dronësh ukrainas që lëviznin drejt rajonit të Leningradit, ku ndodhet Shën Petersburgu, duke rrëzuar mbi 50 dronë.

Sipas autoriteteve komunale të ish-kryeqytetit të Rusisë, dronët ukrainas goditën tre zona, duke shkaktuar dëme të konsiderueshme dhe disa të plagosur, pa përmendur një numër specifik viktimash.

“Herët këtë mëngjes, objektet e infrastrukturës në distriktet Kronstadt, Kirovsky dhe Krasnoselsky u sulmuan nga dronë ukrainas. Disa objekte u dëmtuan. Pasojat po pastrohen aktualisht. Disa persona u plagosën. Nuk pati vdekje”, thuhet në deklaratën e zyrës së shtypit të Bashkisë së Shën Petersburgut.

Metropoli rus po pret të ashtuquajturin “Davos Rus” që fillon sot, e mërkurë, një samit i madh ekonomik nën kujdesin e Presidentit rus Vladimir Putin.

Në total, gjatë natës nga e marta në të mërkurë, forcat e armatosura ruse rrëzuan 354 dronë ukrainas mbi 16 rajone ruse dhe të pushtuara nga Rusia dhe Detin e Azov, raportojnë mediat vendase.

“Gjatë natës së kaluar, sistemet paralajmëruese të mbrojtjes ajrore kanë kapur dhe shkatërruar 354 mjete ajrore pa pilot (UAV) ukrainase me krahë të fiksuar mbi rajonet Belgorod, Bryansk, Voronezh, Kaluga, Kursk, Leningrad, Novgorod, Oryol, Pskov, Rostov, Smolensk, Tver dhe Tula, rajonin e Moskës, Krasnodar, Republikën e Krimesë dhe Detin e Azov”, tha Ministria e Mbrojtjes e Rusisë.

Kësaj i parapriu dje, të martën, një sulm vdekjeprurës rus me dhjetëra raketa dhe dronë kundër qyteteve ukrainase, ndërsa pushtimi rus i Ukrainës vazhdon për të katërtën verë me radhë.